|
Liefde in aksie
“Liewe kinders, ons liefde moenie
net woorde en lippetaal wees nie, maar moet met die daad bewys word, en dan in
opregtheid” (1 Joh 3:18).
1 Johannes 3:18-24
In 1695 het François Fénelon die
aartsbiskop van Cambrai geword.
Mense het gou ontdek dat hy ’n
persoon is wat waarlik omgee, iemand na wie ’n mens met jou probleme kon gaan.
’n Paar boere het eenkeer in sy paleis skuiling gevind toe hulle gedurende die
grensoorlog van hulle grond af verdryf is. Fénelon het opgemerk dat die een man
bekommerd lyk. Dié man bely toe dat die vyand sy koei gesteel het. Hierop het
die aartsbiskop gesê: “Moenie bekommerd wees nie. Ek sal vir jou ’n ander een
koop.” Die man is egter nie hierdeur getroos nie, want hy wou sy eie koei
terughê. Daardie nag, onder die dekmantel van die donker, het die aartsbiskop en
een van sy diensknegte te voet gegaan na die dorpie waarheen die koei geneem is.
Kort ná middernag het die aartsbiskop teruggekeer – met die koei! Hy het nie net
liefde gepreek nie – hy het liefde uitgeleef!
Een liefdevolle daad beteken veel
meer as baie preke, maar ons kan ook liefhê deur die woorde wat ons sê. ’n Woord
van bemoediging kan ’n uitdrukking van liefde wees. Soms kan ’n woord van
waardering ’n bewys van liefde wees. Hierdie woorde versag dalk vir iemand die
wrede kritiek wat hy of sy moes aanhoor.
Daar is tye wanneer woorde van
liefde al is wat vir ons moontlik is.
Tog kan ’n daad, soos dié van
aartsbiskop Fénelon, die eenvoudige oplossing wees vir ’n moeilike situasie. Dit
kan ’n worstelende persoon weer op die regte pad plaas en sy of haar geloof
herstel.
Wanneer laas het jou liefde in dade
oorgegaan nie net teenoor iemand wat aan jou familie of vriendekring behoort het
nie?
Gebed
: Lewende Here Jesus, laat my dade van u liefde getuig.
Hoe iemand ook al is, moet ons hom
of haar steeds liefhê omdat ons God liefhet.
JOHANNES CALVYN
|
