Filadelfia Gemeente se Benoemingskomitee het jaar na jaar die frustrasie ervaar van ure se kopkrap rondom die benoeming van aanvanklik lidmate wat sodanig BEKWAAM geag word om sekere poste te vul, en wanneer hierdie persone nie bereid is om dié verantwoordelikhede op te neem nie, dan die verdere pynigende proses om ‘n GEWILLIGE persoon te kry, en helaas, selfs nog ure deur te swoeg om ENIGE IEMAND te kry om die werk te doen. Die gevolg is dikwels dat mense ampte vul vanweë allerhande ander motiewe as dít waarvoor diens in die gemeente regtig bedoel is, nl. uit vreugde en dankbaarheid teenoor God vir die wonder van verlossing.

Om te voorkom dat sodanige gewilligheid tot diens dalk ook êrens vanuit een of ander vorm van verpligting spruit, is dit noodsaaklik om vas te stel waarvoor mense (1)‘n aanleg en (2)‘n passie het. Die positiewe benutting van hierdie twee aspekte bring mee dat lidmate betrokke kan raak by aksies waarvoor hulle TOEGERUS is in die eerste plek, en tweedens dat hulle GENIET wat hulle doen.

Deur ‘n proses van ontdekking van lidmate se geestelike gawes, en die toepassing daarvan, is daar ‘n begin gemaak om die huidige benoemingstelsel uiteindelik (al kan dit ‘n jaar of twee neem) te vervang, en terselfdertyd van dienslewering ‘n dinamiese gebeurtenis in die gemeente te maak eerder as die gesleep van voete wat dit soms kan wees.

In April 2000 het die eerste agt lidmate van Filadelfia gemeente dié opleiding deurloop, opgevolg met ‘n tweede opleidingsgeleentheid in Augustus van dieselfde jaar. Vroeg in 2001 is die eerste jeuggroep hieraan blootgestel, en in Maart het ‘n groep senior lidmate ook die proses deurloop. Altesaam 48 lidmate is tot dusver opgelei, met ‘n verdere 107 wat nog betrek moet word. Die volgende opleidingsessie word beoog vir die naweek van 18-20 Mei by die Fanie Combrink Vakansieoord te Hekpoort, waar spesifiek  beplan word om die ouers van jong kinders in die gemeente te betrek, met fasiliteite en genoeg ruimte om die jongspan elders besig te hou.

‘n Ontleding van die gawes onder diegene wat reeds opgelei is, sien soos volg daar uit :

Aksies wat al voortgespruit het uit hierdie proses van ontdekking en opleiding is die volgende :

-         ‘n gemeente nuusbrief  “Tussen Ons” wat reeds twee keer verskyn het, en waaraan ‘n hele paar lidmate deelneem deur hul skeppende vermoëns aan te wend ;

-         ‘n gebedsgroep waar spesifiek voorbidding gedoen word vir hierdie projek ;

-         ‘n kwartaallikse vroue-ontbyt ;

-         ‘n Sabbatskool- en aktiewe ontspanningsprogram vir die Hoërskooljeug deur die werkende jeug ;

-         opleiding in blommerangskikking.

Daar is egter ook dié lidmate wat reeds al ‘n geruime tyd volgens hul werkende gawes in ampte of spesifieke dienste aktief werksaam is, en wat steeds onvermoeid daarmee voortgaan.

Filadelfia Gemeente is in die proses van omvorming gebaseer op die uitgangspunt dat die Meesterhand ons lidmate met hul besondere gawes juis in hierdie tyd só saamgestel het dat Sy wil en doel maksimaal uitgevoer kan word onder die leiding van die Heilige Gees.

Terug na Gemeentelike Aksies